ಹೊಂಗೆಹೂವು ಮಾವು ಚಿಗುರಿದೆ
ಚೈತ್ರಯುಗಾದಿಯ ಸಡಗರಾರಂಭಕೆ
ನಾಜೂಕಿನಲಿ ಪ್ರಕೃತಿಯು ಚೆಲುವನ್ನು ಹರವಿದೆ
ಲಜ್ಜೆಯ ವಧುವಿನಂತೆ
ನೋಡಿರಿ ಮನ್ಮಥನ ಗೆಳೆಯನನು
ಹೂಡಿ ನಿಂತಿಹನು ಹೂಬಾಣವನು
ಕಾಮನೆಗಳ ಕೋಡಿ ಹರಿಯಲು
ಕಾಣಿರಿ ಮದನೋತ್ಸವದ ಲವಲವಿಕೆಯನು
ಎಣ್ಣೆಯ ಜಳಕಮಾಡಿ ಹೊಸದಿರಿಸು ಧರಿಸುವರು
ದೇವ ದೇವಿಯರ ನಮಿಸುವರು
ಸಂತಸ ಸಿಂಚನ ಸಂಚಾರದಲಿ
ಭಕ್ಷ-ಭೋಜನಗಳ ಹಂಚಿ ಸಂಭ್ರಮಿಸುವರು
ಹಬ್ಬಹರಿದಿನಗಳ ಆರಂಭವು
ಜಾತ್ರೆಗಳ ಅನುರಣನವು
ನವ ಯೋಚನೆ ಯೋಜನೆಗಳಿಗೆ ಸಕಾಲವು
ಆರಂಬಗಾರನಿಗೆ ಗದ್ದೆಗಿಳಿಯುವ ತವಕವು
ಬೇವು-ಬೆಲ್ಲಧ್ಯೋತಕ ಜೀವನ
ಸಾಗರಯಾನದಲಿ ಸಿಹಿಕಹಿಗಳನುಕ್ರಮಣಿಕೆ
ಹೊಸವರುಷದ ರಾಗರಸ ಮಾಮರದಲಿದೆ
ಕೋಗಿಲೆ ಹಾಡಿದೆ ವಂದನೆ ವಸಂತಮಾಸಕೆ
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ